Alexander Ziegler. (Nachruf).
Zum Tod von Alexander Ziegler.
Schriftsteller, Schauspieler.
Radio DRS-2, Reflexe, 12. August 1987.
Wo d Putzfrau am Zystig Namittag i ds Kammertheater Stock z Züri wölle het, isch d Türe vo inne verrieglet gsy, und sie het der Polizei müesse rüefe. Die het du der tot Körper vom Alexander Ziegler entdeckt, wo no am Abe vorhär i sym neuste Stück "Kokain" ufträten isch. Är het de Fründe gseit, är wöll im Theater übernachte, u dert isch er gstorbe, dert, won är Summer für Summer sys Läben inszeniert, gspielt u bewältiget het. Der Alexander Ziegler isch immer vo däm usgange, won är het erlebt, ou denn, wenn er als Awalt ufträten isch, als selbsternannte Awalt vo de Schwule, vo de Drogenopfer, vo de Gfangnige.
(Wort)
Romän, Ufsätz u Theaterstück het der 43jährig Alexander Ziegler verfasset. Sys erste Buech, "Labyrinth", het er gschriebe, won er isch im Gfängnis gsy, will är sich in e junge Bursch verliebt het u die Liebi ou het erwideret gfunde. Däm seit ds Gsetz "Unzucht mit Minderjährigen".
(Wort)
Dadrüber het er also gschriebe, der Alexander Ziegler. Über Gfangeschaft und Homosexualität, später het er d Grossbanke, d Drogemafia und d Selbstgrächtigkeit i ds Visier gno. Är het das gmacht mit de Mittle vom politische Boulevardtheater, ere Gattig, wo bi üs – im Gägesatz zu Amerika – ke Tradition het u drum ou vo der Fachkritik geng verrisse worden isch. Mit syne Büecher isch's am Alexander Ziegler nid viel besser gange, öppe mit "Eines Mannes Liebe" oder am Titel "Kein Recht auf Liebe". Wo aber sy Roman "Die Konsequenz" isch verfilmet worde, het er vielne junge Schwule bim "Coming out" ghulfe, sich aber glychzytig ou d Kritik vo de Schwulenorganisatione zuezoge, wo ihm hei der Vorwurf gmacht, är operieri mit em Mitleidseffekt, und für d Glychberechtigung vo de Schwule chönne dürezbringe, dörf me nid um Mitleid bättle. Der Alexander Ziegler het sich aber dür die Kritik nid vo sym Optimismus la abbringe:
(Wort)
Aber dä Optimismus het der Alexander Ziegler nid chönne bhalte. Wenn's ou tatsächlich i de 70er Jahr zur e Liberalisierig cho isch, so cha me jetz gseh, wie Aids hüt droht, die gsellschaftlichi Anerkennig vo de Schwule rückgängig z mache. Gwüssi Hiwyse lö eim la anäh, der Alexander Ziegler selber heig ir letzte Zyt ds Gfüehl übercho, är heig vergäbe kämpft.